News

പ്രധാനമന്ത്രി മധ്യപ്രദേശിലെ നഗരവികസന പദ്ധതികള്‍ ഉദ്ഘാടനം ചെയ്തു, സ്വച്ഛ് സര്‍വേക്ഷണ്‍ അവാര്‍ഡുകള്‍ സമ്മാനിച്ചു

ഇന്‍ഡോര്‍: മധ്യപ്രദേശിന്റെ വിവിധ ഭാഗങ്ങളിലുള്ള വിവിധ നഗര വികസന പദ്ധതികളുടെ ഉദ്ഘാടനം പ്രധാനമന്ത്രി നരേന്ദ്ര മോദി റിമോട്ട് സംവിധാനത്തിലൂടെ നിര്‍വഹിച്ചു. പ്രധാനമന്ത്രി ആവാസ് യോജന പദ്ധതി പ്രകാരം നിര്‍മിച്ച വീടുകള്‍, നഗരങ്ങളിലെ കുടിവെള്ള വിതരണ പദ്ധതികള്‍, ഗ്രാമീണ ഖരമാലിന്യനിര്‍മാര്‍ജന പദ്ധതികള്‍, നഗരങ്ങളിലെ ശുചിത്വ പദ്ധതികള്‍, നഗര ഗതാഗത പദ്ധതികള്‍, ലാന്‍ഡ്‌സ്‌കേപിങ് പദ്ധതികള്‍ എന്നിവ ഉദ്ഘാടനം ചെയ്യപ്പെട്ടവയില്‍ പെടും. ഇന്‍ഡോറില്‍ നടന്ന ചടങ്ങില്‍ അദ്ദേഹം സ്വച്ഛ് സര്‍വേക്ഷണ്‍-2018 അവാര്‍ഡുകള്‍ വിതരണം ചെയ്യുകയും സ്വച്ഛ് സര്‍വേക്ഷണ്‍-2018 റിസള്‍ട്ട്‌സ് ഡാഷ് ബോര്‍ഡ് പ്രകാശിപ്പിക്കുകയും ചെയ്തു.
സ്വച്ഛ് ഭാരത് മഹാത്മാ ഗാന്ധിയുടെ സ്വപ്‌നമായിരുന്നുവെന്നും അതിപ്പോള്‍ 125 കോടി ഇന്ത്യയുടെ ദൃഢനിശ്ചയമായി പരിണമിച്ചുവെന്നും ജനക്കൂട്ടത്തെ അഭിസംബോധന ചെയ്യവേ പ്രധാനമന്ത്രി പറഞ്ഞു. ഇന്ത്യയിലെ ഏറ്റവും ശുചിത്വമാര്‍ന്ന നഗരത്തിനുള്ള അവാര്‍ഡ് ലഭിച്ച ഇന്‍ഡോറില്‍നിന്ന് രാജ്യം പ്രചോദനം ഉള്‍ക്കൊള്ളണമെന്ന് അദ്ദേഹം ആവശ്യപ്പെട്ടു. ശുചിത്വം പുലര്‍ത്തുന്നതില്‍ ഏറ്റവും നല്ല പ്രകടനം കാഴ്ചവെക്കുന്ന ഝാര്‍ഖണ്ഡ്, മഹാരാഷ്ട്ര, ഛത്തീസ്ഗഢ് എന്നീ മൂന്നു സംസ്ഥാനങ്ങളെ പ്രധാനമന്ത്രി അഭിനന്ദിച്ചു. ശുചിത്വം മെച്ചപ്പെടുത്തുന്നതില്‍ ഉണ്ടായിട്ടുള്ള പ്രവര്‍ത്തനങ്ങളള്‍ അദ്ദേഹം വിശദീകരിച്ചു. മഹാത്മാഗാന്ധിയുടെ 150ാം ജന്മവാര്‍ഷികം അടുത്ത വര്‍ഷം ആഘോഷിക്കുമ്പോഴേക്കും ഗാന്ധിജിയുടെ സ്വപ്‌നം യാഥാര്‍ഥ്യമായിത്തീര്‍ന്നിരിക്കുമെന്നു പ്രധാനമന്ത്രി ആത്മവിശ്വാസം പ്രകടിപ്പിച്ചു.
നഗരങ്ങളിലെ അടിസ്ഥാനസൗകര്യം മെച്ചപ്പെടുത്താന്‍ ഏതു വിധത്തിലാണു കേന്ദ്ര ഗവണ്‍മെന്റ് ശ്രമിച്ചുവരുന്നതെന്ന് അദ്ദേഹം വിശദമാക്കി. സ്വച്ഛ് ഭാരത് പദ്ധതിക്കു പുറമേ, പ്രധാനമന്ത്രി ആവാസ് യോജന (നഗരങ്ങളില്‍), സ്മാര്‍ട്ട് സിറ്റി പദ്ധതി, അമൃത്, ദീനദയാല്‍ ഉപാധ്യായ ദേശീയ നഗര ഉപജീവന ദൗത്യം എന്നിവയെക്കുറിച്ചും ശ്രീ. നരേന്ദ്ര മോദി പരാമര്‍ശിച്ചു. ഇന്ത്യയുടെ പ്രഥമ സ്മാര്‍ട്ട് സിറ്റിയായ ഇന്റഗ്രേറ്റഡ് കമാന്‍ഡ് ആന്‍ഡ് കണ്‍ട്രോള്‍ സെന്റര്‍ നയാ റായ്പൂരില്‍ കഴിഞ്ഞ ദിവസം താന്‍ ഉദ്ഘാടനം ചെയ്തതായി അദ്ദേഹം ചൂണ്ടിക്കാട്ടി. മധ്യപ്രദേശില്‍ ഏഴു നഗരങ്ങളില്‍ സമാന പദ്ധതികള്‍ തയ്യാറായിവരികയാണെന്നു പ്രധാനമന്ത്രി കൂട്ടിച്ചേര്‍ത്തു. മധ്യപ്രദേശില്‍ വിവിധ നഗര വികസന പദ്ധതികളില്‍ ഉണ്ടായിവരുന്ന പുരോഗതിയെക്കുറിച്ചു വിശദമായി അദ്ദേഹം പ്രതിപാദിച്ചു. ഭവന നിര്‍മാണ പദ്ധതിയിലൂടെ ഭവനരഹിതരായ ഒരു ലക്ഷത്തിലേറെ പേര്‍ക്കു വീട് ലഭിച്ചുവെന്നു പ്രധാനമന്ത്രി വെളിപ്പെടുത്തി.
2022 ആകുമ്പോഴേക്കും എല്ലാവര്‍ക്കും ഭവനം യാഥാര്‍ഥ്യമാക്കുക എന്ന ലക്ഷ്യത്തോടെയാണു കേന്ദ്ര ഗവണ്‍മെന്റ് പ്രവര്‍ത്തിച്ചുവരുന്നതെന്ന് അദ്ദേഹം പറഞ്ഞു. കഴിഞ്ഞ നാലു വര്‍ഷത്തിനിടെ 1.15 കോടി വീടുകള്‍ നിര്‍മിക്കപ്പെട്ടുകഴിഞ്ഞുവെന്നും 2022 ആകുമ്പോഴേക്കും ലക്ഷ്യപ്രാപ്തി നേടാന്‍ രണ്ടു കോടി വീടുകള്‍കൂടി നിര്‍മിക്കേണ്ടതുണ്ടെന്നും പ്രധാനമന്ത്രി വ്യക്തമാക്കി. പ്രധാനമന്ത്രി ആവാസ് യോജന വഴി തൊഴിലവസരങ്ങള്‍ സൃഷ്ടിക്കപ്പെടുന്നതുകൂടി ഉണ്ടെന്നും പദ്ധതി സ്ത്രീശാക്തീകരണം സാധ്യമാക്കുന്നുണ്ടെന്നും അദ്ദേഹം പറഞ്ഞു.
.

Back to Top